предлози/забелешки Регистрацијата на Интернет поддомен е потребна заради именско распознавање на определени називи во структурата на именскиот простор на Интернет мрежата.

Во Мрежниот информационен центар на МАРНет (МАРНет МИЦ) е регистриран врвниот домен за Македонија, '.mk'. Во рамките на тој домен, МАРНет МИЦ може да регистрира поддомени на соодветни организации и установи.

Во согласност со одлуката на Управниот одбор на МАРНет од 8 мај 1995 година, а врз основа на правата делегирани од страна на IANA, избран е хиерархиски модел на адресирање во рамките на врвниот македонски домен '.mk'.

Во согласност со принципот на хиерархиско адресирање произлегува дека примарниот опслужувач за администрирање и управување со врвниот македонски домен '.mk' ги препознава и секундарните и терцијарните поддомени. Правото за нивно понатамошно администрирање МАРНет го делегира во согласност со механизмите на адресирање во МАРНет.

Корисниците на поддомени под врвниот македонски домен '.mk' имаат право да регистрираат исклучително терцијарни поддомени под еден од горенаведените секундарни поддомени. Бројот на поддомените што може да ги регистрира еден корисник е неограничен.